奥迪加特伤势严重？阿仙奴全家福露玄机

xcy232323

阿仙奴队长马田奥迪加特早前喺国际赛受伤，时隔超过1个星期仍未有报告，令人担心佢左脚足踝伤势严重需要长抖。阿仙奴周二(17日)拍摄今季「全家福」，有网民就神探上身发现玄机，指奥迪加特好大机会重伤，17岁小将华拿利随时要帮手顶上。
阿仙奴周二影团体相，布卡约沙卡同奥迪加特坐喺阿迪达两边，不过奥迪加特嘅左脚足踝位置，故意摆咗个足球挡住，大有「此地无银」之嫌。奥迪加特上星期左足踝严重拗柴，肿到连磁力共振都做唔到，网民估计佢系仲未消肿，连波砵都着唔到，所以要咁突兀用个波挡住。
今次「全家福」亦有惊喜，4名小将正式被提拔上一队，当中包括夏天由阿积士加盟嘅英格兰U19门将锡福，而最受注目嘅系17岁中场华拿利，呢位英超史上最年轻上阵球员，被视为奥迪加特接班人，上场联赛作客热刺亦有後备落场，周中欧联作客阿特兰大好可能再有上阵机会。