夏兰特欧联大跌Watt 拒换波衫「笑住闹交」

xcy232323

曼城喺欧联主场0比0闷和国际米兰，开季喺英超大杀三方嘅艾宁夏兰特，全场受到国米严密看管惨食白果。统计显示，夏兰特近13场欧联有9场入唔到波，对住皇马、国米等劲旅就「脚软」，大赛表现不稳问题仍有待解决。
夏兰特今场被国米3中坚巴斯东尼、法兰斯高阿沙比、恩比锡克轮流招呼，全场只得14次掂波，就连最强嘅身体对抗，6次争波亦输咗4次。夏兰特近13场欧联，只系喺对年青人(2次)、哥本哈根同RB莱比锡3队入过波，当中2斗国际米兰、4斗皇家马德里就全部交白卷。
心情麻麻嘅夏兰特，完场後更同法兰斯高阿沙比出现争执，夏兰特投诉对手经常出茅招拉衫，阿沙比反而要求夏兰特送2件波衫畀佢，「唔知好嬲定好笑」嘅夏兰特就笑住爆粗：「死X开！」夏兰特依家喺曼城累积入99球，仲差1球就可以达到100球里程碑。