C朗又轰2球 力压夏兰特成年度「士哥王」

xcy232323

       

        38岁C朗拿度宝刀不老！周二(17日)凌晨欧国外J组赛事，已经出线嘅葡萄牙作客5比0大胜波斯尼亚，缔造8战全胜嘅完美战绩。正选上阵嘅C朗今场延续火热状态，今场又入2球成为赢波英雄，亦令佢喺2023年入球数达到40大关，压倒艾宁夏兰特同基利安麦巴比等人，登上「年度士哥榜」榜首！
        葡萄牙自马天尼斯上任後所向无敌，今场即使已经出线亦强阵出击，开波5分钟即获12码，C朗操刀先开纪录；20分钟C朗接应祖奥菲历斯妙传，巧妙笠射拉开纪录，当VAR确认有球有效，C朗开心到同领队马天尼斯激情拥抱，足证呢位球王对入球有几咁执着。
        领先2球後葡萄牙愈踢愈顺，般奴费南迪斯、祖奥简斯路同祖奥菲历斯喺半场前各入1球，为葡萄牙上半场领先5比0。换边後波斯尼亚加强防守，葡萄牙亦明显放软手脚，C朗喺65分钟就被调离阵，最终葡萄牙未有增添入球，以5比0大胜而回。
        C朗虽然离开欧洲球坛，不过入球能力依然世界顶尖，连同今场2个入波，佢喺2023年总入球数达到40球，足球生涯第12次年度入波突破40关口，而且仲超越埋艾宁夏兰特(39球)，成功登上2023年全球射手榜榜首。C朗今年喺艾纳斯有31个入球，喺葡萄牙国家队入9球。
        2023年士哥王(截止10月17日)
        1.C朗拿度(葡萄牙/艾纳斯) 40球
        2.艾宁夏兰特(挪威/曼城) 39球
        3.华加(匈牙利/费伦斯华路斯/帕克斯) 37球
        4.基利安麦巴比(法国/巴黎圣日耳门) 35球
        5.哈利卡尼(英格兰/拜仁慕尼黑/热刺) 33球