尼马生涯最严重伤患 提早收咧难踢美洲盃

xcy232323

       

        巴西球星尼马喺周三(18日)嘅世盃外严重受伤，所属球会希拉尔同巴西足总证实，呢位31岁前锋检查得到最坏结果，左膝前十字韧带同半月板撕裂，做手术後估计要休息8个月时间，今季提早收咧之外，亦好可能缺席明年夏天嘅美洲国家盃，据报尼马过去5年养伤时间接近2年，令人担心佢唔知仲顶到几耐。
        尼马代表巴西作客乌拉圭一战，完半场前左脚严重受伤，即时喊住咁被担架抬离场，佢效力嘅沙特球会希拉尔发声明：「检查证实尼马左膝前十字韧带同半月板撕裂，将安排日子进行手术，目前未定确实时间，同时会制订手术後康复计划。」尼马夏天加盟希拉尔後，只系踢过5场比赛攻入1球。
        尼马喺证实重伤後失落表示：「呢个系伤心嘅时刻，系我人生最黑暗日子。我觉得自己好坚强......但今次真系好需要家人同朋友嘅支持。伤患唔容易承受，我做完手术康复......4个月後又做手术。我会保持信念，相信上天会安排好。」
        贵为巴西史上「入球王」嘅尼马，近年伤患缠身，西班牙《马卡报》统计自2018年至今，尼马因伤缺阵嘅时间达到640日，大小伤患累计16次，包括试匀左、右脚足踝及跖骨骨折等，但今次系尼马第1次经历膝伤，估唔到亦系佢足球生涯最严重嘅一次伤患。
        尼马今季唔能够再为希拉尔上阵，而且距离明年6月喺美国展开嘅美洲国家盃只有8个月时间，「理论上」尼马到时只系啱啱完成康复疗程，但要回复状态应付高强度比赛就需要更多时间，所以尼马缺席机会极大。尼马好友美斯周四(19日)亦喺社交网贴上两人喺巴塞隆拿时期合照，为佢送上祝福。