英格兰国脚开P庆出线 1意大利球员被奚落

xcy232323

       


        英格兰周三(18日)击败意大利，提前出线明年欧国盃决赛周，一众国脚随即举行庆功派对，祖迪比宁咸、占士麦迪臣等球星同唔少名人都有参加，埋单要成35,000镑(约33万港元)。派对期间佢哋更举杯高呼意大利球员乌杜治，似系寸佢首次正选即输波。
        英国《太阳报》报道，英格兰球员喺伦敦夜店举行庆功宴，基亚利殊、祖迪比宁咸、占士麦迪臣、阿历山大阿诺特等出席，连今次因伤冇入选嘅劳基梳尔都参加，一众球员不断饮酒作乐，玩到朝早6点先至「散Band」。据现场宾客透露，一众球星玩得尽兴但并冇失控，因为佢哋都知道即将要应付球会赛事。
        不过报道指派对中有奇怪一幕，基亚利殊同占士麦迪臣突然举杯高呼手下败将意大利，以及今仗首次为意大利踢正选嘅乌杜治，似系「嘲笑」多过向对手致敬。乌杜治系占士麦迪臣喺热刺嘅队友，佢喺对英格兰一仗多次被菲尔科顿玩谢，更几乎输12码。