东拿利认系病态赌徒 法基奥利停赛7个月

xcy232323

       

        意大利球坛爆出非法赌波丑闻，据报涉及球员超过40人，主角之一辛度东拿利嘅经理人，周二(17日)首度证实该纽卡素球星系「病态赌徒」，将会寻求治疗。至於「赌波门」首个被查嘅球员法基奥利，周二被意大利足总重罚停赛7个月。
        辛度东拿利经理人列素，周二喺伦敦嘅意大利大使馆证实：「东拿尼受到沉迷赌博问题困扰，佢正努力戒除，而且深信一定会赢出呢一仗。佢依家好震惊同难过，我希望今次经验可以拯救佢同其他人(病态赌徒)嘅生命。」意大利传媒指辛度东拿利将向检察官承认曾经赌波(欧联及意甲)，但就否认有下注自己球队嘅赛事。列素同时指辛度东拿利今个星期可以为纽卡素喺英超上阵。
        喺今次赌波丑闻入面率先被查嘅祖云达斯中场法基奥利，周二被意大利足总判罚停赛1年，不过当中5个月嘅刑期，可以透过参与戒赌中心嘅活动嚟代替，即系只需要停赛7个月，而呢位22岁球星亦被勒令参加半年嘅戒赌疗程。