坦哈格放弃「阿积士足球」 锋线数据得啖笑

xcy232323

       

        曼联喺「曼市打吡」惨吞3蛋後，今季10场英超输咗5场，11个入球更加系英超前12名中最少嗰队。坦哈格上任嗰阵一直被寄以厚望，希望可以复兴华丽嘅进攻足球，不过呢位荷兰名帅日前受访，亲口宣布放弃「阿积士足球」，因为曼联冇合适嘅球员，而一条锋线今场吓人嘅进攻数据亦证实呢一点。
        坦哈格喺阿积士省招牌，系佢嘅传控同进攻足球，球迷深信佢会将呢套进攻哲学搬入曼联，不过坦哈格喺访问中，被问到几时可以将战术移植，呢位教头有惊人回应：「永远唔会！曼联永远唔会踢呢种足球，因为球员完全唔同，我唔可以要曼联踢阿积士嘅足球，踢法系要因应球员，阿积士有独特嘅比赛方式，我喺曼联会展现另一种足球。」
        事实上，曼联条进攻线确实难以实践进攻足球理念，《天空体育》喺「曼市打吡」後做咗个统计，曼联今季锋线6个球员，有5个都系0入波+0助攻，包括海伦、安东尼马迪尔、安东尼马菲奥斯、加拿祖同查顿辛祖，只有拉舒福特喺761分钟比赛入面录得1入波+1助攻，咁嘅数据踢进攻足球真系得啖笑。