美斯纪录性8夺金球奖 钦点2大新星延续传奇

xcy232323

       


        「球王」美斯再创历史！周二(31日)凌晨金球奖颁奖礼，去年带领阿根廷赢世盃冠军嘅美斯，大热姿态第8度赢得金球奖，进一步抛离「死对头」C朗拿度嘅得奖次数(5次)。美斯自2009年首夺金球奖，14年来写下无数辉煌故事，过去1年经历首夺世盃、进军美职等巨变，今届极可能系36岁美斯最後一次拎金球奖，佢亦钦点夏兰特同麦巴比，会喺未来几年金球奖掀激烈争逐。
        过去15届金球奖选举，有13届都落喺美斯同C朗手上，C朗喺今届连候选名单都未能进入，不过美斯就喺36岁之龄成就生涯最高峰，过去1年帮巴黎圣日耳门赢法甲冠军、为国际迈亚密赢北美联赛盃冠军，最重要当然系上年底带领阿根廷喺卡塔尔捧走世盃冠军，喺决赛周射入7球嘅美斯无疑系灵魂人物。
        如果唔系世盃冠军光环，上季协助曼城成为「3冠王」嘅艾宁夏兰特会系得奖热门人选，最终美斯力压夏兰特(第2)同麦巴比(第3)当选，喺国际迈亚密班主、英格兰名将碧咸手上接过金球奖奖座，美斯表示：「能够再次嚟呢度享受呢个时刻实在太好，我从未谂过自己会有咁嘅足球生涯，赢世盃系我嘅梦想，我庆幸自己身处史上其中一队最佳球队。」
        今个夏天决定离开欧洲转战美职，今届好可能系美斯最後1次拎金球奖，佢亦大方钦点未来金球人选：「夏兰特同麦巴比终有一日会拎金球奖，佢哋都经历不可思议嘅1年，夏兰特今年都好有资格得奖，佢赢咗英超、欧联同所有神射手奖项，我肯定未来几年佢一定会攞奖。」
        美斯今次带同老婆洛古丝素同3个囝囝一齐出席，最後佢更向已故阿根廷球王马纳当拿致敬：「最後我想多谢马纳当拿，今日系你嘅生忌(10月30日)，我想同你分享呢个殊荣。」另外，带领西班牙赢女子世盃嘅邦玛迪，就首度夺得女子金球奖。
        2023金球奖前10名
        1 美斯(国际迈亚密)
        2 艾宁夏兰特(曼城)
        3 基利安麦巴比(巴黎圣日耳门)
        4 奇云迪布尼(曼城)
        5 洛迪卡斯简迪(曼城)
        6 云尼斯奥斯祖利亚(皇家马德里)
        7 祖利安艾华利斯(曼城)
        8 域陀奥森汉(拿玻里)
        9 贝拿度施华(曼城)
        10 莫迪历(皇家马德里)
        金球奖得奖名单
        金球奖：美斯
        女子金球奖：邦玛迪
        KOPA奖(最佳U21球员)：祖迪比宁咸
        耶辛奖(最佳门将)：达米安马天尼斯
        梅拿奖(单季入球最多)：艾宁夏兰特
        最佳球队：曼城
        最佳女足球队：巴塞隆拿女足
        苏古迪斯奖(表彰人道主义工作)：云尼斯奥斯祖利亚