迪亚斯归队操练 有望上阵斗卢顿

xcy232323

       

        利物浦球星路易斯迪亚斯嘅父母上周喺哥伦比亚被绑架，呢位26岁前锋需要处理家事，缺席近2场比赛，但佢非常敬业，近日已经归队参加操练，有望出战周一(6日)凌晨英超作客卢顿。
        路易斯迪亚斯嘅妈妈已经获救，但爸爸文奴尔仍在绑匪手上，哥伦比亚政府指今次绑架事件系由左翼叛军「民族解放军」（ELN）所为，总统佩特罗已安排进行和谈，ELN随後亦宣布将会尽快释放迪亚斯爸爸文奴尔。预料事件应该可於短期内解决，所以路易斯迪亚斯亦放心归队操练。
        利物浦领队高普表示，会畀路易斯迪亚斯充裕时间平复心情，唔急於派佢上阵：「迪亚斯已经参加2日操练，我哋要再等等，如果佢感觉良好，当然可以继续同球队一齐操练，一切视乎情况而定，我哋等紧哥伦比亚方面嘅好消息。」路易斯迪亚斯今季为利物浦上阵11次入3球。