风水轮流转！马古尼翻生踢华拉尼去沙特

xcy232323

       

        曼联中坚哈利马古尼今夏被褫夺队长职务，更几乎被卖去韦斯咸，不过呢位英格兰国脚默默耕耘，近几仗重夺正选兼表现大获好评，反而法国中坚华拉尼就成为後备，有传华拉尼对情况感到不满，唔排除1月份会转去沙特阿拉伯搵食！
        拎过世界盃同欧联冠军嘅华拉尼，一直被视为曼联防线核心，但系近1个月出现变化，英超对曼城一仗坦哈格以「战术原因」将佢贬後备，因为佢嘅右中坚位置更适合马古尼发挥，之後英联盃对纽卡素，可以解释系「留力」，但上场作客富咸，健康兼抖够嘅华拉尼再一次坐冷板，到93分钟先至入场「踩草」，似乎已成为马古尼替补。
        据《Teamtalk》报道，沙特球会有意喺1月斟华拉尼加盟，其中一个有兴趣球会就系艾纳斯，华拉尼有望再同C朗拿度合作。报道指华拉尼唔会接受成为後备中坚，如果情况持续不变，1月转会窗离队并唔系冇可能。