|
|
英超球会今夏转会总支出，达到破纪录嘅24.4亿镑（约234亿港元）。不过贵价货唔一定系好嘢，开季短短3个月，已经有唔少「水货」现形，既有新兵货不对办沦为笑柄，亦有人未上过阵已经受伤长抖，令球会大失预算。今日就同大家严选今季英超10大最失败收购。
美臣蒙特难脱７号魔咒
曼联今夏以6,000万镑（约5.8亿港元）向车路士购入中场美臣蒙特，可以话系今夏性价比最低嘅收购，皆因呢位英格兰国脚当时得番1年合约，「红魔」忍多阵，明夏就可以免费签入。不过曼联偏偏出高价抢人，仲将「传奇7号」波衫交畀佢，可惜蒙特加盟後，演出仍然低迷，季初更因伤缺阵超过1个月。
中场踢匀晒无所适从
美臣蒙特位置上同队长般奴费南迪斯有重叠之嫌，领队坦哈格为派佢上阵，叫佢踢过中场多个位置，甚至连防守中场都试过，令蒙特无所适从，搞到仲未为球队入过波，似乎注定无法打破曼联近年「7号魔咒」呢个宿命。
美臣蒙特
位置：中场
年龄：24
球会：曼联
国籍：英格兰
转会费：6,000万镑
奥拿拿狂虾碌球迷眼冤
曼联领队坦哈格为贯彻後场组织踢法，今季不惜放弃迪基亚，重金向国际米兰签入最强「用波型龙门」奥拿拿。事实上两人早喺阿积士年代合作过，理应夹惯夹熟，可惜曼联嘅防线以至中场，根本冇能力转踢传控战术，结果奥拿拿得唔到适当配合下，变得两头唔到岸，仲经常犯错。
逼走迪基亚变「公敌」
奥拿拿嘅加盟，亦间接令上季金手套得主迪基亚败走奥脱福，搞到球迷迁怒於奥拿拿，加上佢今季18场失30球嘅肉酸数据、扑球甩手同自杀式误传等虾碌经常出现，球迷自然见到佢就眼冤。
奥拿拿
位置：门将
年龄：27
球会：曼联
国籍：喀麦隆
转会费：4,700万镑
英超最贵卡些度愧对身价
今夏畀利物浦同车路士争崩头、最终以1.15亿镑（约11亿港元）天价上车嘅摩西斯卡些度，成为英超史上最高身价球员。要知道白礼顿3年前只系用450万镑将佢买返嚟，如今身价狂飙接近26倍，极度夸张。
11亿上车演出平庸
事实上卡些路效力「海鸥」时期嘅表现，确实可能值呢个价。年轻、防守硬净及出色嘅转守为攻能力，系呢位厄瓜多尔国脚嘅卖点，可惜佢转投车仔後一直踢唔出水准，首战斗韦斯咸後备落场卤莽犯规搞到球队输12码，开坏咗个头。之後表现亦唔起眼，成日标失波连累球队失波，睇嚟呢笔天价交易都系倒钱落海。
摩西斯卡些度
位置：中场
年龄：22
球会：车路士
国籍：厄瓜多尔
转会费：1.15亿镑
周身刀冇张利夏维斯天才变庸才
阿仙奴上季争冠功亏一篑，今夏不惜疯狂增兵，当中由车路士签入夏维斯，就系「一场赌博」，而根据呢位德国国脚季初嘅平淡演出，阿仙奴无疑「赌输咗」。
夏维斯出道时被视为天才，但加盟车仔後定位模糊，改踢中锋更加冇料到，阿仙奴重金收购後，领队阿迪达将佢定位「8号」中场，可惜成效麻麻，至今只系靠一个12码射入1球。虽然夏维斯今季客串前锋偶有佳作，但问题系「周身刀，冇张利」，近日更有传「达叔」正式「投降」，打算将佢卖畀皇家马德里。
夏维斯
位置：中场
年龄：24
球会：阿仙奴
国籍：德国
转会费：6,500万镑
尼干古一伤再伤车仔硬食
尼干古今夏过档车路士，属「蓝战士」其中一个重磅收购。季前热身赛所见佢都几对办，频频有士哥，点知喺热身赛对多蒙特时唔好彩整伤膝头，结果要开刀治理，抖到依家都仲未喺正式赛事上过阵，能否喺英超立足充满疑问。
尼干古过去两季效力RB莱比锡期间确实有料到，前季以20个入球13次助攻当选德甲最佳球员，上季以16球并列德甲神射手，但佢旧年卡塔尔世盃前已经因为膝伤被迫退队，依家一伤再伤，车仔惟有硬食。
尼干古
位置：中场
年龄：25
球会：车路士
国籍：法国
转会费：5,200万镑
东拿利衰烂赌成个球季玩完
严格嚟讲，辛度东拿利唔算系水货，呢名意大利中场加盟纽卡素後，为球队上阵12场射入1球，取得6胜2和4负，有东拿利在阵嘅「喜鹊」，实力大为升级，原本可望令呢支亿万大军提升到更高层次，可惜佢衰赌波，被意大利足总重罚停赛10个月，并要上8个月戒赌课程。
东拿利今季已经玩完，即使下季复出，冇踢成季仲夹唔夹得番队波都成疑问，纽卡素可谓「得人无所用」，佢哋更怀疑AC米兰早就知情，喺交易时刻意隐瞒，正研究紧系咪向A米提出诉讼，要求对方赔偿。
辛度东拿利
位置：中场
年龄：23岁
球会：纽卡素
国籍：意大利
转会费：6,400万欧元
高华锡跌Watt哥帅信错人
德国防守中场根度简坚持离队，令曼城急觅代替品，结果上季效力车路士嘅高华锡，成为「蓝月」今夏第一签。呢位克罗地亚中场喺皇马及车仔赢尽各项锦标，领队哥迪奥拿期待佢嘅经验，可以为球队带来冲击。
不过可能曼城实在太心急，冇考虑到高华锡已经走紧下坡，足球统计网站WhoSocred.com，就2022/23球季上阵超过1,500分钟嘅球员评分，高华锡得分排倒数第4。事实上，佢代替唔到根度简助攻助守嘅角色之余，阵上犯规嘅难睇程度更令人汗颜，联赛对阿仙奴一役两度走甩红牌，如果再系咁落去，曼城随时因为佢嘅卤莽而赔上奖盃。
高华锡
位置：中场
年龄：29岁
球会：曼城
国籍：克罗地亚
转会费：3,000万镑
拉维亚未落过场备受质疑
年仅19岁罗美奥拉维亚被誉为比利时明日之星，佢喺曼城青训出身，转投修咸顿後成为球队主力，就算「圣人」上季降班都唔愁出路，结果车路士今夏抢赢利物浦，将佢收归旗下。但拉维亚摆脱唔到车仔新兵魔咒，连热身赛都未踢过，就喺操练中整伤右足踝韧带，据报今个月尾先可以复出。
拉维亚身价5,800万镑，以一个唔够20岁嘅球员嚟讲，唔可以叫平，外界都质疑车仔买贵咗，呢位踢法被指似巴塞布斯基斯同曼城费兰甸奴嘅中场，系咪值呢个价，仲要时间印证。
罗美奥拉维亚
位置：中场
年龄：19
球会：车路士
国籍：比利时
转会费：5,800万镑
海伦空有拚劲入波未够数
C朗离队後，曼联一直搵紧一位多产射手，今夏收购哈利卡尼失败，转为睇中阿特兰大箭头海伦，最终斥资7,200万镑收购呢位丹麦国脚。虽然海伦喺今届欧国外表现唔错，甚至被誉为「新夏兰特」，但其实佢上季意甲只系入9球，唔算好标青，加盟曼联时已经有球迷泼冷水。
今季联赛仲未开斋
事实证明球迷眼光更胜曼联管理层，海沦场上虽拚劲十足，但入波唔算多，虽然喺欧联射入5球叫唔错，不过今季英超上阵9场仲未开斋，梗系唔合格。盛传曼联喺冬季转会窗重开後再搵射手，间接承认收购海伦系失败之作。
海伦
位置：前锋
年龄：20
球会：曼联
国籍：丹麦
转会费：7,200万镑
添巴长抖乱达叔算盘
祖利安添巴作为一名可打左右闸兼防中嘅多功能後衞，同时经历过上年世盃洗礼，阿仙奴季前只用3,800万镑转会费，就将呢位荷兰年轻国脚收归旗下，睇落超笋。事实上添巴喺季前热身赛同社区盾表现都大获好评，令「厂迷」以致主帅阿迪达都对佢有无限憧憬。
可惜呢位前阿积士青训产品，喺开咧首仗联赛对诺定咸森林，踢到下半场初段突然痛苦倒地，赛後证实佢右膝ACL（前十字韧带）重伤，需要做手术及长抖足足7个月。「达叔」好拣唔拣拣咗只「玻璃脚」，打乱晒如意算盘。
祖利安添巴
位置：後衞
年龄：22
球会：阿仙奴
国籍：荷兰
转会费：3,800万镑
|
|
发表于 2025-4-16 15:45:43