曼联同英冠侯城拍跳 云迪碧克终於有得踢

xcy232323

       

        曼联大部分主力去咗国家队报到，冇分踢国际赛嘅球员，日前喺卡灵顿中心同英冠嘅侯城进行热身赛，结果踢成1比1，据报道几位主力球员表现出色，其中好耐冇见嘅云迪碧克终於有得落场。
        《曼彻斯特晚报》报道，曼联冇分踢国际赛球员其实唔多，报道特别点名安东尼马菲奥斯、云迪碧克同米积伯利3人，另外仲派出多位青年队员落场戥脚，亦容许前青训学院球员前来观摩。坦哈格希望透过比赛，畀一班边缘球员提升状态，上述3位主力今场都有出色表现，但只能同侯城踢成1比1打和。
        报道特别提到云迪碧克，呢位荷兰中场今季仅上阵2场合共21分钟，佢同曼联仲有两年合约，近几个转会窗曼联都希望将佢出售，嚟紧1月冬季转会市场都唔例外，但至今未有合适报价。
        至於安东尼马菲奥斯系坦哈格嫡系，早前有传闻新股东拉特克利夫打算将呢位贵价翼锋出售，但遭坦哈格拒绝，不过由於佢近期状态低迷已被贬为後备。