夏维斯献绝杀 阿仙奴赢波做「1哥」

xcy232323

       


        两大劲旅曼城同利物浦对决打和下，阿仙奴周日(26日)凌晨把握机会，凭夏维斯完场前献「绝杀」，作客1比0险胜宾福特，以1分力压曼城登上英超榜首位置。今场系阿仙奴领队阿迪达第200次领军，第116场胜仗系「兵工厂」史上最佳成绩。
        由於曼城同利物浦失分，阿仙奴今场只要赢波就上榜首，不过面对宾福特严密布防，进攻机会唔多，反而门将兰斯达尔失误几乎出事，好在迪格兰赖斯勇救空门。阿仙奴完半场前曾有李安度杜沙特顶入，但VAR判越位在先惨食诈胡，半场踢成0比0。
        阿仙奴去到尾段加强压力，夏维斯喺79分钟後备上阵成为奇兵，佢喺完场前1分接应布卡约沙卡右路传中，入楔远柱近门顶入，呢球亦系佢加盟阿仙奴後第1个「生波」入球。完场後阿迪达特意将佢推向作客球迷区面前，畀佢接受球迷嘅欢呼声。
        阿迪达赛後对夏维斯大为赞赏：「呢个就系足球美丽嘅地方，艰难时刻入波总会得到更多赞美，每个人都同夏维斯讲我哋有几爱佢，背後系有原因，佢面对困难嘅态度系全队嘅模范，一个咁好嘅球员成为赢波英雄，每个人都为佢开心。」