利物浦杀入英联盃决赛 同车路士争冠军

xcy232323

       

        英联盃决赛戏码出炉！利物浦周四(25日)凌晨作客1比1打和富咸，两回合合计赢3比2，纪录性第14次杀入英联盃决赛，2月26日嘅「王者战」将同老对手车路士争夺冠军。利物浦同车路士近20年第5次喺盃赛决赛碰头，之前4次决赛双方各捧2冠，势均力敌。
        首回合领先2比1嘅利物浦，开波11分钟就由路易斯迪亚斯个人表演，左路推大位抽射入网。富咸急起直追，下半场抢番唔少攻势，55分钟利物浦门将基利靴严重犯错，但安达斯彭利拿窄位射空门中柱弹出；富咸喺77分钟由伊沙迪奥普追平，可惜为时已晚，利物浦以总比数3比2晋级决赛。
        今次系利物浦纪录性第14次杀入英联盃决赛，如果捧盃更会成为首支10度封王球队，领队高普赛後表示：「今场有好多事令我开心，但讲到尾，最重要嘅事都系晋级，喺呢个伟大嘅夜晚，我哋唔需要踢华丽嘅足球，而系为入决赛而战，我哋成功咗！」
        2月26日嘅决赛会喺温布莱球场上演，利物浦同车路士冤家路窄，近20年来第5次喺盃赛决赛对决，车路士赢咗05年嘅英联盃同12年嘅英足盃；21/22球季「红军」、「蓝战士」更连续喺两大本土盃赛决赛争逐，结果「红军」2场都靠互射12码赢波捧盃。