巴塞隆拿惊天惨败 沙维宣布季尾离任

xcy232323

       

        巴塞隆拿周日(28日)凌晨西甲，主场戏剧性3比5不敌维拉利尔，继日前西盃出局後再历惨败，依家落後榜首皇家马德里10分，衞冕机会渺茫。备受抨击嘅教练沙维赛後宣布，将会喺今季完结後正式离任，形容做巴塞隆拿教练系一件「残忍」嘅工作。
        巴塞隆拿今仗迎战维拉利尔中门大开，上半场被谢拉特摩兰奴攻陷，54分钟再被艾哥马治射成2比0。佢哋之後绝地大反击，根度简、柏迪加上艾历拜利乌龙波，令巴塞隆拿一度反超前3比2。估唔到神奇反胜之後仲有更神奇嘅反胜，干卡路古亚迪斯84分钟追平3比3，「黄色潜艇」喺补时9分钟同12分钟，再由阿历山大索洛夫同荷西摩拉利斯建功，戏剧性5比3击败巴塞隆拿。
        近况低迷嘅巴塞隆拿，月初喺西超盃决赛1比4不敌皇马，日前西盃又2比4不敌毕尔包出局，今仗再被维拉利尔轰入5球。据Opta数据显示，今仗系巴塞隆拿自1963年主场1比5输畀皇马後，首次喺西甲主场被对手轰入5球或以上，称得上系耻辱性输波。
        经历连场惨败，沙维赛後喺记者会宣布：「喺你哋问问题前，我要宣布喺6月30日开始唔再做巴塞教练，呢个系我同球会商量後嘅决定，作为一个巴塞球迷，我知道球会需要转变，队内依家气氛紧张，呢个决定或者可以解放部份球员，离开前我会竭尽全力，我觉得我做咗正确决定。」
        对於作出呢个重大决定，沙维解释：「有人问我会唔会系巴塞嘅费格逊，但呢个系冇可能，做巴塞教练系一件残忍、唔开心嘅工作，好多人会对你不敬、攻击你，并且会影响到你，直到你作出我今日呢个决定为止。我辞职会令形势冷静，至少你哋(传媒)依家唔会杀死我，就算巴塞今季捧欧联冠军都唔会改变(决定)。」