巴塞惨败 皇马提前夺西甲冠军

xcy232323

皇家马德里勇夺西甲冠军！「1哥」皇马周六(4日)主场3比0大破卡迪斯，由於巴塞隆拿之後2比4不敌基罗纳，令皇马喺只剩4轮联赛下带出13分，提早锁定联赛冠军。今次系皇马史上第36次西甲冠军，追平祖云达斯喺意甲夺冠次数，并列欧洲5大联赛史上夺冠最多纪录。
周中要踢欧联4强次回合嘅皇马，周六喺半力出击之下，凭巴谦戴亚斯、祖迪比宁咸同祖斯奴喺下半场各建一功，主场轻松大胜3比0。周日(5日)凌晨登场嘅巴塞隆拿，作客基罗纳输波即告衞冕失败，虽然佢哋靠安达斯基斯坦臣同罗拔利云度夫斯基入波，半场领先2比1，点知换边後防线崩溃连失3球，最终2比4输波，带挈皇马提早封王。
得悉球队提早夺冠後，皇马教练安察洛堤接受球会官方电视台访问表示：「非常开心！皇马喺每一方面都完全值得赢冠军，我哋好想同球迷一齐庆祝，但大家都知星期三有个好重要嘅挑战(欧联4强)，我哋要专心备战，拎到令球迷开心嘅结果，下个星期再同球迷一齐庆祝西甲冠军。」