场外爆枪击案 球员拒作赛 比瑞战半场腰斩

xcy232323

       

        周二(17日)凌晨欧国外F组赛事，比利时喺布鲁塞尔迎战瑞典，赛前当地爆出恐怖枪击案，据报2名着瑞典波衫嘅球迷遇害，令赛事蒙上哀伤气氛，半场踢成1比1後，瑞典球员决定唔继续比赛，球证宣布赛事腰斩，观众亦被呼吁继续留喺场馆内，等情况安全先至离开。
        欧洲足协发声明表示：「监於布鲁塞尔发生疑似恐怖袭击，欧洲足协同瑞典、比利时以及布鲁塞尔警方协商後，决定将比赛腰斩。」瑞典足总就叫随队作客嘅约700名球迷留喺场内，球场亦开放记者室畀球迷暂避，唔少瑞典球迷都忍唔住流泪。
        瑞典领队赞尼安达臣表示：「当我哋半场休息知道呢件事，觉得完全唔系真实，我哋生活喺一个乜嘢世界？全队球员一致同意，出於对死难者同佢哋屋企人嘅尊敬，我哋唔想继续比赛。」今场比赛瑞典15分钟由基奥基尼斯入波领先，比利时喺31分钟获12码，由卢卡古操刀追平，半场1比1平手。