西班牙出线欧国盃 19岁加维奠定核心地位

xcy232323

       

        周一(16日)凌晨欧国外赛事，A组西班牙作客1比0击败挪威，提前2轮拎到决赛周资格，同时带挈埋次席嘅苏格兰一齐晋级。19岁中场加维今仗一箭定江山，成为西班牙史上最年轻入5球球员，同时今场已经系佢第25次为西班牙上阵，奠定狂牛核心地位。
        西班牙自上年世盃後表现回勇，今场面对挪威控制大局，艾华路莫拉达20分钟曾射入空门，但被VAR判定越位在先作废；踢到49分钟挪威门前混战，加维10码附近抽入全场唯一入球。西班牙同苏格兰喺A组有15分，抛离只剩1场嘅挪威5分，双双拎到出线资格。
        巴塞隆拿中场加维17岁就代表西班牙，依家虽然只得19岁，但已经25次代表国家队上阵，今场射入第5个国际赛入球，更系西班牙史上最年轻入5球球员。西班牙近代中场3大Icon沙维、恩尼斯达、布斯基斯，喺19岁仍未曾踢过国家队，相反加维已经踢过世界盃，明年更会首度进军欧国盃。
        西班牙领队富安迪赛後表示：「加维系一个好有实力嘅球员，我锺意佢嘅一切，好开心佢系一个西班牙人。」加维赛後亦话：「我对今场战果好开心，努力终於有回报，西班牙处於一个好好嘅走势，锁定欧国盃入场券令人兴奋。」