史达宁抢射12码被闹爆 彭马成刽子手

xcy232323

       

        车路士周日(22日)凌晨主场2比2打和阿仙奴，踢出今季其中一场最佳表现，不过上半场开纪录嘅12码就出现争议镜头，史达宁曾经抢走高尔彭马个波争射12码，结果要安素费南迪斯出头，指令畀番高尔彭马操刀，而呢位小将亦不负所望成功射入。
        今夏先加盟嘅高尔彭马，上场联赛已射入12码拎到转会後第1个入球，今仗球证判罚12码後，获指派嘅高尔彭马就拎住个波准备处理，点知史达宁突然走嚟夹硬抢走个波，旁边嘅安素费南迪斯就代出头，一直指住高尔彭马话要佢操刀，最终史达宁扁晒嘴咁还番个波出嚟。
        事实上，史达宁加盟车路士後从未射过12码，而佢喺球会生涯曾经7次操刀，结果有4次射失，成功率唔够一半，咁都想去争射12码就令车迷不满，批评佢嘅行为可能会影响高尔彭马。至於高尔彭马连续2场成功射入12码，以21岁168日之龄，成为英超史上第3年轻连续2场入12码球员，仅次於布卡约沙卡同安洛夫，进一步巩固车路士刽子手地位。