纽卡素「3重争议」入波 破阿仙奴不败身

xcy232323

       

        周日(5日)凌晨英超赛事，纽卡素主场凭一个「3重争议」入波，以1比0击败阿仙奴，打破「兵工厂」今季英超不败身。纽卡素嘅入波极具争议，VAR用长时间去覆核「出界」、「犯规」同「越位」3大疑点，结果全部判决都系维持入球有效。阿仙奴领队阿迪达赛後炮轰球证判决系「耻辱」。
        两队今场踢得非常激烈，出现大量埋身镜头，上半场阿仙奴中场夏维斯曾鲁莽飞铲逃过红牌，纽卡素中场般奴古马雷斯亦多次报复式开肘同踢人，球证亦冇表示。全场唯一入球出现喺64分钟，当时祖尔韦洛克喺底线拎波，传中畀祖连顿头槌二传，由安东尼哥顿龙门口赶到射入。
        不过呢球波疑点重重，首先系祖尔韦洛克喺底线拎波嗰刻，个波似乎已经完全超出底线，之後祖连奴头槌二传，亦明显「双龙出海」将阿仙奴守将推跌，但VAR呢两个检查都认为冇问题，最後审视越位嘅画面，更因为所有摄影机角度都被球员遮住，睇唔到出脚时间点而「未能画线」，最终判入球有效。
        阿迪达赛後愤怒表示：「我哋要问下呢球波点解会成立？实在难以置信，我觉得好羞耻，球证容许呢个波成立系耻辱。作客纽卡素已经够艰难，佢哋系支好出色嘅球队，但呢种(执法)水平完全唔符合号称世界最佳联赛嘅英超，我唔理佢哋(PGMOL)讲咩，一切都已经太迟。」