曼联小胜卢顿 坦哈格50战劲过高普

xcy232323

       

        近期表现备受批评嘅曼联，周日(12日)凌晨主场1比0小胜卢顿，联赛2连胜压过纽卡素升上第6位。今场系曼联领队坦哈格第50场英超，虽然呢位荷兰教头面临炒鱿压力，但原来佢头50场英超得分，比利物浦主帅高普更劲，喺曼联史上亦只系仅次於传奇费格逊。
        曼联今场控制战局，但系一众前锋继续脚头无灵，喺英超仍未开斋嘅海伦错失2次黄金机会，最终「红魔鬼」再一次靠後衞入波打救，瑞典国脚域陀连迪路夫喺禁区混战中抽入，亦系佢相隔接近3年以来再为曼联入波，协助球队小胜1比0完场。
        今仗系坦哈格上任後第50场联赛，当中拎到30场胜仗系曼联史上第1人，讽刺嘅系佢头50场拎到96分，比高普执教利物浦头50场(92分)更高，就算同曼联嘅前领队相比，坦哈格嘅得分(96分)亦高过晒摩连奴(95分)、尹戈尔(94分)等人，仅次於费格逊(103分)排史上第2。
        坦哈格赛後表示：「就算经历咗咁多挫折，我哋依家仍然处於一个好嘅位置，非常接近前4名。当曼联踢番出水准，就会有几个月冲刺期，而且其他球队都会有低潮同失分。我哋近5场联赛赢4场，考虑到今季出现咁多麻烦，依家嘅位置其实好唔错。」