纽亚神奇3连救 拜仁分组赛6年未输过

xcy232323

       

        周四(30日)凌晨欧联分组赛A组，已笃定出线嘅拜仁慕尼黑，主场0比0打和哥本哈根，呢个战果令榜尾嘅曼联保留一丝出线希望。拜仁今场失分，令佢哋欧联分组赛17连胜走势断缆，但连续39场分组赛不败走势延续，对下轮必需赢拜仁嘅曼联嚟讲，似乎系个坏消息。
        拜仁今场继续强阵，哈利卡尼喺前线挂帅，不过面对决心十足嘅哥本哈根未见太大优势，全场只有2次中龙攻门，若非门将纽亚喺87分钟上演「神奇3连救」，哥本哈根有权绝杀赢波送曼联出局，最终两队0比0握手言和。
        拜仁教练杜曹赛後不满球队表现：「喺冇出线压力之下，我原本预期球队会踢得更放，我觉得球员未够努力。」虽然拜仁慕尼黑已肯定首名出线，但佢哋喺分组赛嘅稳定性非常惊人，对上一次输波已经系6年前输畀巴黎圣日耳门。