曼联又输！作客前8球队2年未赢过！

xcy232323

       

        曼联又输一场！周日(3日)凌晨英超大战，曼联作客0比1不敌纽卡素，延续作客对前列份子「九死一生」嘅颓势。据Opta数据显示，曼联自2021年10月赢热刺後，作客对住联赛前8名球队从未赢过。曼联领队坦哈格赛後死撑球队坚强，一定可以再次反弹。
        曼联今场安排劳基梳尔踢左中坚，前锋就意外由安东尼马迪尔代替海伦担正，不过面对主场气势强劲嘅纽卡素就全场捱打。纽卡素有超过20次攻门，包括捷比亚罚球射中楣底弹出，最终喺55分钟由安东尼哥顿接应捷比亚传中，近门射入全场唯一入球。
        曼联今季作客热刺、阿仙奴同纽卡素都输晒，数据显示「红魔鬼」自2021年喺苏斯克查带领作客赢热刺後，喺英超13次作客对排喺联赛前8名球队，只有3和10负嘅羞家战绩。坦哈格赛後被问到呢个问题就大耍太极：「我等紧你(记者)问呢条问题，你哋嘅工作就系睇出当中嘅问题，我哋有主场状态、作客状态，依家呢个问题我哋一定会解决。」
        曼联周四(7日)凌晨会喺英超快车大战车路士，坦哈格就话有信心球队会反弹：「呢支球队非常坚强，我喺季初对曼城惨败後，大家仍然团结一致，按计划向前迈进。我听日会同球队检讨今场比赛，然後为周中比赛做好准备。」