又系你呀？贺柏战绩彪炳 热刺再得益

xcy232323

       

        曼城对热刺嘅精彩赛事，赛後焦点落喺球证西蒙贺柏身上，呢位41岁判官「人气」爆灯，事关今季英超唔少经典嘅争议判决都有佢份，包括10月份利物浦对热刺嘅「世纪误判」，无独有偶热刺都系成为误判得益者。
        西蒙贺柏喺今季开锣战已经「响朵」，曼联主场1比0赢狼队一战，无视奥拿拿出迎手槌失误，打中对手头部一幕，事後英国职业裁判员公司(PGMOL)话事人韦比道歉，承认应该系12码。
        10月初利物浦作客1比2不敌热刺，出现西蒙贺柏同VAR沟通误会，将利物浦嘅合法入球误当越位，虽然呢球波VAR嘅责任更大，但西蒙贺柏喺该仗亦争议性2次赶利物浦球员出场，其中1张红牌事後亦被足总嘅球证小组裁定系错误判决。
        根据原定安排，西蒙贺柏将会喺周四(7日)凌晨，执法锡菲联对利物浦嘅英超快车，不过经历今次闹剧之後，PGMOL有机会将佢喺今轮赛事执法名单中移除，或者可以救番利物浦一命。