麦汤米尼再做救世主 曼联2比1力克车路士

xcy232323

       

        周四(7日)凌晨英超瞩目大战，曼联同车路士2支褪色劲旅交锋，结果主场嘅曼联踢出翻身仗，凭麦汤米尼梅开二度赢2比1。苏格兰中场麦汤米尼今季前已接近被放弃，但佢再一次喺水心火深中拯救领队坦哈格，依家更以5个入球成为队中首席射手，绝对系曼联之宝！
        曼联喺欧联面临出局，上场联赛又输畀纽卡素，盛传坦哈格失去球员支持，不过今场曼联斗志高昂，9分钟安东尼马菲奥斯博到12码，但般奴费南迪斯操刀宴客。19分钟哈利马古尼射门被挡出，麦汤米尼第1时间补射入网，可惜佢哋顶唔到返更衣室，完半场前被高尔彭马追成1比1。
        换边後曼联再攻过，69分钟阿历真度加拿祖传中，麦汤米尼再次接应顶入2比1，尾段车路士群起反扑，一度喺曼联禁区制造险象，最终「红魔鬼」都坚守城池赢波。曼联喺10月初经历2连败後，对宾福特亦系靠麦汤米尼喺补时连入2球反胜，今场再次成为曼联救星。
        麦汤米尼赛後表示：「我哋想向球迷显示，我哋只系集中比赛，但呢种表现需要喺每个星期都表现出嚟，而唔系被逼埋墙角先间唔中踢1场好波。」对於佢今季入球大爆发，麦汤米尼回应：「呢一样系我想继续建立嘅踢法，爸爸妈妈同爷爷都叫我多啲入禁区尝试入波，我只需要相信自己做得到。」