谢德谦：热刺新兵带来队内竞争

xcy232323

       

        今晚曼联主场大战热刺，两队排名只差3位，实力非常接近，但以状态嚟讲，热刺无占先少少。
        曼联近10场只赢得3场，包括上场足总盃2比0淘汰韦根，佢哋好耐未试过连胜，如果主帅坦哈格谂唔到计，今场极大机会失分。门将奥拿拿踢埋今场先返国家队报到出战非国盃，必出尽法宝抵挡热刺来犯，同时间查顿辛祖外借返多蒙特，不过呢名翼锋长期被投闲置散，离队对「红魔」影响唔大。至於前锋海伦上场频频失机，仍然获坦帅力撑，落场自必加倍落力望一洗颓风。
        热刺近期全面回勇，近6场赢咗5场，不过队长孙兴民暂时离队踢亚洲盃，肯定对攻力有影响。虽然佢哋成功喺RB莱比锡借用迪姆华拿，不过呢位德国射手仲未磨合，就算匆匆落场都难以取代「孙仔」位置。热刺喺转会市场动作多多，签入罗马尼亚中坚达古辛，同时亦放走两名冗员，包括将迪积史宾斯外借热拿亚，以及卖艾历迪亚畀拜仁慕尼黑，新兵报到自然会刺激队内竞争，估计佢哋会较为积极，随时反客为主。