金玟哉清洁药检室 赶都唔走赢赞赏

xcy232323

       


        南韩今届亚洲盃杀入4强，力争相隔64年後再度称霸亚洲，效力拜仁慕尼黑嘅中坚金玟哉，唔单止想喺球场上扬威，就连场外一样唔想失礼。据报喺8强对澳洲後，金玟哉被抽中做药检，检查完成後佢竟然留低清洁药检室，就连被职员赶都唔肯走，坚持唔可以令南韩畀人有话柄批评。
        金玟哉对澳洲踢足120分钟，赛後佢同李康仁被捉去做药检，而且做咗2个钟头先完成，当大家想尽快返酒店休息，金玟哉就开始清洁，包括执毛巾、清理澳洲球员做药检後留低嘅小食袋同水樽。南韩队经理李在哲表示：「我话有专人负责清洁，但佢坚持继续，佢觉得如果搞到立立乱就走人，可能会招人话柄，金玟哉话整理一下间房唔系太辛苦，但确保唔会畀人讲闲话。」
        金玟哉嘅行动获南韩球迷同传媒大赞，可惜佢因为上场累积黄牌，4强对约旦将要停赛，教练奇连士文透露可能考虑改踢3中坚。