「亿万败军」写决赛输波纪录 普帅同保利反面？

xcy232323

       


        车路士喺英联盃决赛不敌利物浦，失冠之余仲写下耻辱纪录，佢哋成为英格兰足球史上首支，连续6场本土盃赛决赛输波球队，赛後更被加利尼维利讽刺系「亿万败军」，引嚟领队普捷天奴不满。普帅亦自身难保，佢喺领奖嗰阵疑似无视老板保利，传闻车仔帅位难保。
        车路士自2019年英联盃决赛输波後，近5年6度杀入本土盃赛决赛，遗憾嘅系全部都饮恨而回，当中3次系输畀利物浦，写下英格兰史上最唔光彩纪录。曼联名宿加利仔为《天空体育》评述嗰阵话：「加时战系高普细路对普捷天奴『亿万败军』，但车路士唔抵可怜，佢哋踢到畏首畏尾。」
        车路士近2年斥逾10亿镑(约100亿港元)买人，但普捷天奴仍交唔到货，佢赛後反击加利仔嘅「亿万败军」言论：「我尊重佢嘅意见，但唔会接受，如果比较2队年龄其实系差唔多，利物浦最後系出咗几个新人，但唔可以拎两队比较，环境同体系都完全唔同，佢咁讲好唔公平。」
        美国班主保利今场有去温布莱观战，颁奖期间出现奇怪一幕，当普捷天奴上台拎亚军奖牌嗰阵，竟然无视保利直行直过，反而停低同保利身边嘅人握手，保利嘅表情就「年初四咁嘅样」。普捷天奴赛前已被传帅位岌岌可危，依家连最大捧盃机会都失去，唔少车迷都认为佢被炒只系时间问题。