【英超】纽奴战术闷到爆 森林稳守细水长流

xcy232323

今晚英超独脚戏，由诺定咸森林主场硬撼水晶宫。森林喺最叻打闷波嘅纽奴领导下，季初战绩算系喜出望外，防守稳健系主因，撞正前线死晒火嘅水晶宫，闷斗闷唔慌多波入，一於捧2.5球细盘。（Now 621周二凌晨3时直播）
听到纽奴呢个名，就会谂起一个字：闷，之前教热刺打稳守突击，冇成绩又闷到爆，不得民心而遭炒鱿，不过你咪理，纽奴喺中型班用呢招确系打出成绩，无论以往执教狼队，抑或上季季中接手森林，都成功护级。今季开咧後森林表现平稳，各项赛事打咗8场，录得2胜5和仅1败，包括造访晏菲路击败利物浦，令人惊喜，佢哋绝对唔介意打闷波，防线塞到密密麻麻，再用「木头」基斯活特做支点，配合赫臣奥杜尔同艾兰加去「哨」，简单直接，难怪呢8场入得8粒及仅失7球，7次开2球或以下。
另边厢，水晶宫开季之後唔多顺，最大问题系攻力疲弱，今夏放走法国中场米高奥利斯，令伊比尔治伊斯要孭起晒进攻组织重任，成为对手众矢之的，而箭头桑马迪达因要出战奥运而较迟归队，抖得少又脚风唔顺，联赛入得2粒，临「闩窗」前从阿仙奴签入嘅尼基迪亚，勤力有余但把握力麻麻，至今仲未开斋，令水晶宫经常出现得势不得分情况。加上今季7场联赛未赢过，只系入得5粒咁大把，遇上防守大过天嘅森林，好难有大手交易。
更多赔率：
https://bet.hkjc.com/ch/football/allodds/50035630