咩玩法？「新迪比亚路」为入波破纪录道歉

xcy232323

周三(18日)凌晨欧联，祖云达斯阔别2年後再次出战呢项大赛，主场以3比1击败燕豪芬，今季获得10号球衣嘅新星基伦耶迪斯射入1球靓波，以19岁零136日打破名宿迪比亚路嘅纪录，成为祖记史上最年轻欧联入波球员。赛後呢位土耳其国脚觉得唔好意思，公开向迪比亚路道歉，认真谦虚。
祖云达斯连续2场意甲闷和0比0後，今场终於火力全开，上半场21分钟，基伦耶迪斯喺左路盘球，杀入禁区射远柱弯入，非常精彩，属於迪比亚路招牌射法。仅过6分钟，韦斯顿麦坚尼近门射入成2比0。换边後初段，尼高拉斯干沙利斯建功，呢位阿根廷今场有1次助攻及入1球，燕豪芬只能喺补时由伊斯美沙巴利射入破蛋。
赛後基伦耶迪斯当选今场最佳球员，佢话：「我有些少紧张，但系好开心，我哋踢出1场精彩比赛，我想向迪比亚路道歉，打破咗佢嘅纪录。」迪比亚路1995年以20岁零308日首次欧联入波，佢有份担任今场评述，大赞呢位後辈射门有力度、有角度，控球能力完美，认为佢有能力孭起10号球衣。
基伦耶迪斯2年前由拜仁慕尼黑青年军加入祖云达斯青年军，上季升上一队，各项赛事上阵32场入4球，当时已被捧为「新迪比亚路」，会方今夏同基伦耶迪斯续长约，并交10号球衣畀佢，做真正迪比亚路接班人。
基伦耶迪斯今季各项赛事上阵5场入1球及2次助攻，奠定主力地位。