夏兰特疯狂大四喜 曼城炒狼队紧追阿仙奴

xcy232323

曼城同阿仙奴嘅英超争逐刺激，「兵工厂」周六(4日)主场3比0炒般尼茅夫，随後出场嘅曼城亦唔执输，主场5比1大破狼队，仅1分落後踢多1场嘅阿仙奴，曼城只要赢晒余下3轮就会实现英超「4连霸」。曼城前锋艾宁夏兰特今场食出「大四喜」，继续刷新入球纪录，衞冕金靴奖机会极高。
曼城今场信心十足，复任正选嘅夏兰特弗爆，12分钟主射12码先开纪录，36分钟「泰山压顶」头槌再入1球，完半场前佢禁区内被铲跌，再入多球12码，半场已大演帽子戏法。53分钟狼队由黄喜灿破蛋，但夏兰特1分钟後即个人表演轰入世界波，食出「大四喜」。曼城尾段再有祖利安艾华利斯锦上添花，最终大炒狼队5比1。
夏兰特依家以25球喺射手榜一枝独秀，英超生涯第6次单场入3球或以上，亦系继高尔同奥云後，英超史上第3个2次喺上半场「戴帽」球员，呢位挪威神锋早前被曼联名宿坚尼批评为「英乙级球员」，佢赛後亦寸爆回应：「我唔在乎嗰个人讲嘅嘢！」夏兰特登陆英超未够2季，63场联赛入61球，认真夸张。
曼城赢晒最後3轮就成功衞冕，领队哥迪奥拿赛後表示：「下场一定要作客赢富咸，呢个会好困难，之後作客热刺又系艰难，要追番阿仙奴嘅得失球系冇可能(输6球)，所以我哋唔可以和波。阿仙奴歇冬之後表现冇得顶，我哋要先赢之後2场，希望到煞科日仍然掌握冠军主导权。」
●阿仙奴余下赛程
11/05 作客Vs曼联
19/05 主场Vs爱华顿
●曼城余下赛程
11/05 作客Vs富咸
15/05 作客Vs热刺
19/05 主场Vs韦斯咸