洛里斯连环出丑 热刺输波2连败

xcy232323

       

        开季表现勇猛嘅热刺近期打回原形，周一(24日)凌晨英超主场对纽卡素，因门将洛里斯连环出丑，主场1比2不敌纽卡素连输第2场，同时被打破今季主场不败之身。完场後热刺再度畀自己球迷狂嘘，佢哋对领队干地嘅保守踢法亦愈嚟愈不满，不过呢位意大利教头就指球队阵容仍需要增强，叫球迷畀多啲耐性。
        热刺上场输畀曼联後，今场作出5个变动，不过踢法上仍然系靠哈利卡尼同孙兴民自己搵食，比赛早段孙兴民有2次具威胁攻门但未能入波，转头就到门将洛里斯「出事」。31分钟洛里斯冲出禁区解围，点知撞落哥林威尔逊身上自己跌低，哥林威尔逊第1时间25码笠入空门，VAR检查後认为冇犯规，判入球有效。
        法国门将洛里斯惊魂未定，40分钟交高波畀左路队友，但力度不足直接畀纽卡素球员截到，米基尔阿米朗把握机会杀入禁区窄角度射成2比0。热刺下半场倾力反扑，但组织唔到似样攻势，只系靠角球由哈利卡尼喺54分钟顶入，最终热刺仍要输1比2，今季各项赛事主场7连胜後首度输波。
        完场後热刺主场出现一片嘘声，球迷矛头直指干地嘅保守踢法，唔少网民留言批评：「干地系耻辱，热刺有几个世界最顶尖球员，但佢要呢班球员踢般尼嘅战术，赢都赢得肉酸。」、「热刺落後之下，干地最後10分钟换入马特杜靴迪同宾戴维斯，简直系笑话。」
        干地赛後就解释：「我哋尝试逐步加强球队，但系需要时间同耐性，以我经验去睇，球队依家已经做得好好，如果系1星期1场波，热刺有能力争取重要锦标，但3日一场嘅话球队需要加强，如果有人唔锺意听呢啲说话，咁唔系我嘅问题。」