迪基亚连环神救 坦哈格暗寸安历基唔识货

xcy232323

       

        曼联喺英超主场1比0赢韦斯咸，西班牙门神迪基亚力保不失功劳好大，佢今场作出4次精彩扑救，包括补时阶段飞身挡出迪格兰赖斯嘅超级重炮，曼联领队坦哈格赛後大赞呢位西班牙门将，暗寸西班牙领队安历基唔拣佢踢世界盃系唔识货。
        迪基亚今场有唔少精彩扑救，包括救出米查利安东尼奥劲射、葛特苏马顶死角头槌，以及完场前迪格兰赖斯角度、劲度兼备嘅远射，31岁嘅佢喺奥脱福球场已经连续第5场「零失球」，状态唔错，不过西班牙传媒日前报道，迪基亚连西班牙55人世盃初选名单都冇份入围。
        有分析指迪基亚「脚下功夫」欠佳，唔适合西班牙後场组织踢法，但坦哈格就力撑迪基亚兼暗寸安历基：「每个人都有自己谂法，但我认为一个龙门嘅首要任务，就系保护大门同唔失波，喺呢个范畴迪基亚系冇得顶！迪基亚用脚都唔差，我相信佢做得到(後场组织)，之前嘅比赛佢亦证明自己做得到。」