卢卡古再伤或缘尽世盃 比利时受致命打击

xcy232323

       

        卡塔尔世界盃今个月展开前，陆续有球星受伤消息出现，国际米兰周一(31日)宣布，之前因伤抖咗差唔多2个月嘅卢卡古，近日操练再度触伤大腿旧患，未来几日会做详细检查。消息指呢位比利时国脚将缺席世盃前所有赛事，令佢出战决赛周亮起红灯，对比利时争霸无疑系致命打击。
        卢卡古喺8月底受伤後，足足抖咗接近2个月，上星期欧联对柏辛域陀尼亚复出，後备上阵即有入波，上场联赛对森多利亚同样後备上阵，国米原本打算畀佢慢慢适应，点知反而喺操练出事。国米声明表示：「卢卡古左脚 股二头肌拉伤，未来几日会作再评估。」
        意大利传媒报道，国米喺世盃休战前4场比赛，卢卡古几乎肯定唔会上阵，意味佢今季只有255分钟比赛时间，就算比利时真系照拣佢踢世界盃，卢卡古有冇足够状态应付都系一大疑问。29岁嘅卢卡古为比利时上阵过102场，68个入球令佢成为比利时史上入波最多球员，喺阵中位置无可取代。
        比利时喺今届世盃身处F组，同组有克罗地亚、摩洛哥同加拿大，首场分组赛会喺11月23日对加拿大，如果卢卡古最後真系踢唔到，领队马天尼斯会考虑起用巴舒亚伊或新人奥宾达，甚至可能会用夏萨特出任「假9号」顶替。