C朗因一事未能注册 将连累队友被炒

xcy232323

       

        葡萄牙巨星C朗以天价1.73亿镑年薪，高调加盟沙特阿拉伯球队艾纳斯，但几时可以上演首战，却成为疑问，继需要坐2场「跨联赛」波监之後，又出现另一个问题，原来艾纳斯已用尽外援名额，C朗唔可以注册，除非球会出售或解雇其中1位外援，腾出位置畀C朗，否则佢冇得上阵。
        C朗上季因打烂爱华顿小球迷电话，被英足总判罚停赛2场嘅处分要喺沙特执行，艾纳斯未来2场联赛都唔使预佢。
        原本C朗可於香港时间1月23号凌晨踢首场沙特联赛，主场对伊蒂法克，但依家又节外生枝，艾纳斯内部人士向外媒爆料，指球队已用尽8个外援名额，所以仲未为C朗注册，必须同其中1位外援解约，C朗先至能够注册，成为艾纳斯正式球员。
        艾纳斯阵中8位已注册外援，包括喀麦隆前锋阿布巴卡、巴西前锋塔利斯卡、巴西中场路尔斯古斯达禾、阿根廷中场比堤马天尼斯、乌兹别克中场马沙拉普夫、科特迪瓦後衞基斯兰恩高兰、西班牙後衞艾华路干沙利斯、哥伦比亚门将奥斯宾拿。
        当中最大机会被「牺牲」嘅外援应该系马沙拉普夫，佢今季联赛仅上阵1场。值得一提，早前传出马沙拉普夫拒绝让出7号球衣畀C朗，而面临被解雇，虽然会方澄清，指马沙拉普夫早已答应改着77号，但以目前情况睇，恐怕马沙拉普夫都系难逃被C朗「逼走」嘅厄运。
        另外，艾纳斯将於1月19日同巴黎圣日耳门踢表演赛，唔受外援人数限制，届时可能成为C朗为新球队嘅首战，兼重遇宿敌美斯，可谓别具意义。