迪基亚同意减薪续约 有望曼联踢到收山

xcy232323

       

        曼联今季表现回勇，西班牙门将迪基亚亦有出色表现，呢位32岁钢门今个夏天就回复自由身，据报曼联希望同佢续约，但前提系呢位全队最高薪球员要减人工，消息指迪基亚为继续留效「红魔鬼」，将同意大幅减薪换取新约。
        英国《每日电讯报》报道，迪基亚喺2019年签嘅合约只剩半年，虽然曼联有权启动自动续约1年条款，但佢高达37.5万镑嘅周薪就成为最大障碍。报道指曼联希望同迪基亚商讨另一份新合约，可以开出更长年期，但迪基亚就要接受大幅减薪，已效力曼联12年嘅迪基亚亦倾向续长约。
        迪基亚早前接受访问，亦表明想喺曼联踢到收山嘅梦想：「我当然希望喺曼联收山，我一直都话曼联系我嘅球会，喺呢度效力好多好多年，对我嚟讲属一大荣幸。我唔担心续约问题，只系专注於练习同比赛，希望最後会有一个美满结局。」