红魔大旧前锋数据太肉酸 面临被退货

xcy232323

       

        曼联喺冬季转会市场不惜向比锡达斯赔偿250万镑，都要借用般尼前锋韦格贺斯，顶替C朗位置，但呢位30岁荷兰国脚表现每况愈下，平均每场只有1.4次射门，如果以每90分钟计算，更低至0.6次，仲少过後衞达洛治，据悉今季结束後，曼联无意留用韦格贺斯，甚至余下赛事都可能收起佢。
        韦格贺斯至今为曼联上阵7次，仅於英联盃对诺定咸森林，射入1球，并冇助攻。呢位身高1米97嘅高大前锋唔止入波少，甚至射门次数都少得可怜，上阵7次合共仅有10次射门，而且平均每场只再3.7次喺对方禁区内触球，上仗英超主场列斯联，更只录得1次，结果踢咗59分钟就被换走，由查顿辛祖入替。
        最讽刺系久疏战阵嘅查顿辛祖入波为曼联扳平，令韦格贺斯处境更加尴尬。韦格贺斯曾於今季为比锡达斯上阵18次入9球，但成「魔」後踢到冇影，英国传媒抽水话，英冠球队般尼都唔要韦格贺斯，就知佢咩料啦。