般奴费南迪斯Show Time！葡萄牙派9蛋

xcy232323

       

        周二(12日)凌晨欧国外J组赛事，葡萄牙主场9比0狂数卢森堡，创下球队史上最大胜仗纪录。喺C朗拿度停赛之下，「刷数据」嘅任务就落喺中场般奴费南迪斯身上，呢位曼联球星今场交出1入波同3次助攻，协助葡萄牙喺欧国外踢出完美成绩。
        对住鱼腩卢森堡，葡萄牙上半场领先4比0，干卡路拉莫斯同干卡路恩拿斯奥各自梅开二度，後者2个入波都系由般奴费南迪斯助攻；葡萄牙下半场愈数愈兴奋，般奴费南迪斯再交1入波1助攻，迪亚高祖达(2球)、祖奥菲历斯同列卡度贺达都有进帐，葡萄牙最终大胜9比0，打破旧嘅最大胜仗纪录(8比0)。
        葡萄牙自马天尼斯执教後，欧国外6战全胜排J组榜首，攻入24球而未失1球，堪称系完美成绩。马天尼斯赛後表示：「呢场胜仗好重要，喺领先4球情况下好容易会失去专注，但我哋一直保持态度去到最後1分钟，我好锺意球员嘅态度，佢哋将被列入葡萄牙足球史册。」