英格兰反胜意大利出线 最强进攻组合面世

xcy232323

       

        周三(18日)凌晨欧国外C组赛事，英格兰主场3比1反胜意大利，提前2轮锁定明年决赛周参赛资格。英格兰今场表现唔算突出，但哈利卡尼同祖迪比宁咸呢对进攻拍档，就踢出火花成为「三狮兵团」嘅致胜法宝，领队修夫基赛後直指2人将系英格兰明年争夺冠军嘅关键人物。
        呢场上届欧国盃决赛翻版战，英格兰15分钟被施卡马卡近门攻陷先落後，不过佢哋之後重掌战局，箭头哈利卡尼经常堕後策应，让出中锋位置畀祖迪比宁咸後上插入，32分钟就收到效果，祖迪比宁咸中路突破杀入禁区被踢跌，哈利卡尼操刀12码追成1比1平手。
        英格兰反超前1球又系祖迪比宁咸表演，呢位皇家马德里球星後场精彩抢波，淡定控波後再交出靓波畀拉舒福特反击，後者不负所托射成2比1。英格兰喺77分钟再由哈利卡尼入波锁定3比1胜局，喺C组6战5胜1和笃定首名出线，连续4届跻身欧国盃决赛周。
        祖迪比宁咸今场光芒四射，成功过人、拦截同制造犯规次数都系全场最高，赛後获选为今场最佳球员；攻入2球嘅哈利卡尼亦创造纪录，呢位英格兰史上「士哥王」，喺温布莱球场累积24个入球，超越卜比查尔顿(23球)成为温布莱史上入波最多球员。
        修夫基赛後表示：「比宁咸咁嘅年纪(20岁)有咁嘅影响力系难以置信，佢嘅力量、决心、技术喺年轻球员之中非常罕见，佢会系英格兰嘅催化剂！」修夫基对哈利卡尼同样大赞有加：「我哋太习惯哈利卡尼入波，所以低估咗佢对球队嘅重要性，佢嘅全能表现系世界顶级。」