法基奥利负债300万欧元：东拿利介绍我赌！

xcy232323

       

        意大利近期爆出「赌波门」，祖云达斯中场法基奥利日前率先被罚停赛7个月，据《都灵体育报》引述法基奥利出席听证会期间证供，呢位22岁新星因沉迷赌博欠债达300万欧元(约2,500万港元)，而且更「笃爆」辛度东拿利就系介绍佢入「火坑」嘅人！
        法基奥利表示自己染上赌瘾，系因为太多空闲时间，而起因系2021年一次意大利U21集训，佢见到辛度东拿利喺手机下注，追问之下，辛度东拿利就介绍佢一齐试，更为佢喺非法赌波网站登记开户，强调唔会被追查到。法基奥利话：「我最初赌网球，但之後负债愈嚟愈多令我抑郁，上年9月开始就赌埋足球希望回本，包括意甲同欧联赛事。」
        上年4月份，法基奥利曾喺对萨斯索罗一仗犯错失波，被换走後喺後备席上流泪，当时球迷以为佢系自责，但法基奥利透露佢当时系因为债务严重而抑郁落泪。泥足深陷嘅法基奥利表示：「我愈赌就输得愈多，债主曾经威胁要打断我只脚，後期就算我赢都唔会有钱落袋，只系减低个债务。我要问人借钱，加迪(祖云达斯队友)借畀我4万欧元，我都仲未还。」
        法基奥利嘅自首同「爆料」令佢获得减刑，已承认系病态赌徒嘅纽卡素中场辛度东拿利，据报将会面临更严厉嘅处分。