车路士又输 净吞宾福特两蛋

xcy232323

       

        英超周六早场车路士对宾福特，「蓝战士」全场围攻对手但攻极唔入，仲喺下半场被对方偷袭得手，最终输0比2，近4场3胜1和之後再度输波，全失3分。
        车路士伤兵潮未结束，梅迪历缺阵，普捷天奴搵咗马杜基打右中场，呢位英格兰U21表现活跃，开赛10分钟即有一次窄位起脚，可惜中楣唔入。
        24分钟出现争议一幕，史达宁禁区内攞波，被罗亚斯列夫从後推跌，球证并无表示，场边嘅普捷天奴嬲爆，原来呢位球证，就系早前执法热刺对利物浦、引起极大争议搞到裁判公司道歉嘅西蒙贺柏，佢害完利物浦後，依家又走嚟搞车路士。
        半场冇交收之後，宾福特下半场嚟料，58分钟，麦比奥莫右路压过古古列拿底线传中，宾诺克远柱接应头槌破网，宾福特领先1比0。
        输紧波嘅车路士被迫变阵，换入列斯占士、戴伦马特臣，末段连小将乌高卓古同华盛顿都换埋出嚟搏杀，但结果都追唔番，补时仲因为空群而出畀麦比奥莫反击整多粒，最终车路士输0比2完场。