【有片】安东尼狂躁踢人 羞家数据现魔性

xcy232323

       

        曼联主场0比3输畀曼城，两队水平嘅差距喺唔少球迷意料之内，不过曼联球员似乎输得唔忿气，比赛尾段开始狂躁踢人，完场前4分钟先上阵嘅安东尼马菲奥斯，报复式怒踢谢利美杜古获球证网开一面只出黄牌，连曼联名宿加利尼维利都话「好尴尬」。
        曼城领先3球大局已定下，87分钟仲换入「扭波王」谢利美杜古，结果呢位比利时快翼惨成出气袋，般奴费南迪斯先有肉酸起脚「踢空」，之後轮到安东尼马菲奥斯出招，第一下冲前拦截踢唔中後，即拉弓狂踢报复，并且两度大力打走谢利美杜古指控嘅手指。评述嘅加利尼维利表示：「佢真系离晒大谱！呢个系要红牌，安东尼做乜？好尴尬！」
        谢利美杜古赛後亦反击，喺社交网贴出佢同安东尼对峙嘅图片，留言「保持冷静...曼彻斯特是蓝色的」，而且加上按摩头部嘅emoji，寸安东尼经常「上脑」。数据显示，安东尼马菲奥斯自上年以1亿欧元(约8.26亿港元)加盟曼联後，喺英超只贡献6个入球(4入波+2助攻)，唔及佢拎黄牌(7张)嘅数字。