马斯真兰奴打人情牌 想请美斯踢明年奥运

xcy232323

       

        阿根廷大小国脚出现「抢人才」大战，阿根廷U20国家队主帅马斯真兰奴希望邀请老友美斯以超龄球员身份，参加明年巴黎奥运会男足赛事，但由於阿根廷大国脚将於明夏出战美洲国家盃，相信美斯无法应付两项大赛，令佢陷入两难局面。
        马斯真兰奴同美斯唔止系前阿根廷国家队友，亦曾经一齐为巴塞隆拿捧过西甲及欧联冠军，甚至乎阿根廷赢得2008年北京奥运男足金牌，两人都系队友。
        马斯真兰奴现时身为「阿奥队」主帅，希望搵埋美斯一齐出战明年奥运重温旧梦，佢话：「球队大门永远为美斯而开，如果我哋取得奥运会资格，美斯又想参赛嘅话，我非常欢迎佢加入，我同佢嘅友情非常深厚，好愿意咁做。」
        巴黎奥运将於明年7月26日至8月11日举行，至於美洲国家盃将於明年6月20日至7月14日举行，理论上美斯可以踢晒两项赛事，但考虑到佢已经36岁，恐怕难以应付频密赛程，佢所属球会国际迈亚密亦唔想佢离队太耐，所以美斯只能二选一。
        由於阿根廷系上届美洲国家盃冠军，身负衞冕重任，加上阿根廷小国脚仲未获得奥运会入场券，一般相信美斯只会代表大国脚踢美洲国家盃。