新世代球王诞生 比宁咸超越施丹全球激赞

xcy232323

       


        年仅20岁嘅英格兰中场祖迪比宁咸，周六(28日)喺西甲「国家打吡」光芒四射，个人梅开二度带领皇家马德里作客2比1反胜巴塞隆拿，今季西甲10场联赛入10球，已超越传奇施丹喺皇马单季最高入球数字。比宁咸赛後万千宠爱在一身，新世代球王正式诞生！
        比宁咸喺68分钟一记禁区外炮弹式入波，将死气沉沉嘅皇马唤醒，去到补时2分钟，丹尼尔卡华积右路传中，近柱嘅莫迪历未能控低个波，反而造就比宁咸门前入楔「绝杀」。皇马赢波後以28分继续排榜首，同巴塞隆拿差距拉开到4分。
        比宁咸今季10场西甲入10球，法国球王施丹过往最多入波球季都系得9球(02/03、05/06)；计埋欧联比宁咸踢13场有13个入波同3次助攻，首次出战「国家打吡」就做英雄，教练安察洛堤表示：「佢一季可以轻易入20至25球，我哋冇谂过佢系一个神射手，比宁咸依家疯狂入波，我仲等紧其他前锋挞着。」
        巴西前锋云尼斯奥斯祖利亚亦话：「比宁咸好神奇，佢总系扭转战局，球迷习惯咗有C朗嘅日子，依家又一个(球王)诞生！」除皇马队友之外，曼城前锋艾宁夏兰特都喺社交网cap图大赞：「呢个人劲到超现实！」