马天尼斯膺最佳门将被嘘爆 麦巴比咩反应？

xcy232323

       

        今届金球奖颁奖礼，阿根廷球员成为大赢家，除美斯历史性第8次赢金球奖，门将达米安马天尼斯亦荣获「耶辛奖」(最佳门将)，不过佢上台领奖嗰阵就出现大片嘘声，巴黎嘅球迷不满佢喺赢世盃後对基利安麦巴比连番嘲讽，至於主角之一嘅麦巴比就全程木口木面。
        颁奖礼喺巴黎举行，马天尼斯到场嗰阵已经受到「攻击」，唔少球迷向住佢大叫「麦巴比」，当大会宣布马天尼斯得奖嗰阵，现场再传出大片嘘声，要主持之一嘅杜奥巴出手呼吁观众安静。镜头亦第1时间影住同场嘅麦巴比，只见呢位法国国脚面无表情，似乎唔想有话柄再被卷入呢场是非。
        31岁嘅马天尼斯亦冇任何反击动作，佢喺神秘颁奖嘉宾爸爸嘅手上领奖，事後佢表示：「能够入围15名我已经觉得好光荣，但我永远渴求赢得更多，喺我嘅梦想旅程入面出现好多绊脚石，努力战斗令我今日可以走上呢个重要舞台，我要好好享受。」
        马天尼斯喺上年世盃决赛2救12码，成为阿根廷夺冠英雄，不过佢赛後多番向麦巴比挑衅，包括完场後叫队友为麦巴比「默哀1分钟」，胜利巡游期间又拎住一个「喊包麦巴比」公仔，因而得罪所有法国球迷。