罗马补时入2粒反胜 卢卡古绝杀将功赎罪

xcy232323

       

        周一(6日)凌晨意甲有戏剧性赛事，罗马主场先落後下，喺补时阶段神奇连入2球反胜，而贡献「绝杀」嘅系状态大勇前锋卢卡古，呢位比利时球星更成为巴迪斯图达後，罗马最强嘅新加盟前锋！
        罗马上仗输畀国际米兰後，今仗返主场对莱切，开波5分钟就获得12码，但卢卡古操刀被救出，两队之後互有攻守，莱切71分钟由艾姆基斯先开纪录。罗马尾段群起反扑，91分钟阿斯蒙头槌追平，3分钟後卢卡古接应保罗戴巴拿直线，转身推入禁区抽入，用绝杀将功赎罪，为罗马神奇反胜2比1。
        卢卡古夏天加盟罗马後，喺头9场联赛攻入6球，系球会自94/95球季嘅巴迪斯图达後，新加盟球员头9场联赛最高入球数字。罗马教练摩连奴赛後表示：「我好熟悉卢卡古，佢系一个情绪敏感嘅人，当佢12码宴客，佢成场波都会好难过，所以呢个绝杀再好不过，卢卡古可以瞓个好觉，听朝笑住咁起身。」