曼联连续4轮被罚12码 「福仔」红牌冤枉？

xcy232323

       

        曼联喺欧联作客3比4不敌哥本哈根，今场比赛出现唔少争议性判决，其中哈利马古尼上半场手球输12码，更系曼联连续第4场欧联被罚极刑，加上拉舒福特嘅红牌同哥本哈根首个入波都引起争议，难怪领队坦哈格赛後暗示被球证针对。
        曼联今届欧联多灾多难，第1轮对拜仁有基斯甸艾历臣手球输12码，第2轮对加拉塔沙雷轮到卡斯米路送12码，上轮主场对哥本哈根又有麦汤米尼禁区犯规，靠奥拿拿扑出先至赢波，估唔到今仗又到哈利马古尼手球；Opta数据显示，曼联系欧联史上首支喺头4轮分组赛都被罚12码嘅球队，认真黑仔。
        今场除咗12码有争议外，拉舒福特张红牌亦引起热话，夏格维斯、史高斯、加利尼维利都指「福仔」系全心食位，踩中对手只系意外，加利仔直指球证判决系「耻辱」。另外，哥本哈根追番1比2嘅入球，当时有越位嘅哥本哈根球员企喺奥拿拿面前，亦有影响比赛之嫌。
        曼联领队坦哈格赛後批评球证：「我哋失咗2个唔应该计嘅入球，所以非常失望。唔止今场，我哋已经好多场面对不利嘅判决，成季流流长，希望终有一日到我哋得益。拉舒福特全心攞波，红牌系太严苛，球证睇咁耐证明佢都唔肯定；哥本哈根第1个入波系越位，第2球12码，哈利马古尼喺嗰个环境可以做咩？」