【有片】巴甲争议 总监闯VAR房想打球证

xcy232323

       

        VAR嘅出现原本系想减少误判，但结果却出现更多争议，周一(13日)嘅巴甲联赛出现罕见一幕，哥连泰斯作客对甘美奥一仗，客队职员因为不满VAR嘅执法，竟然即场冲去VAR房想打球证，几名保安喺门口及时将佢制止。
        争标份子甘美奥主场对哥连泰斯，开波10分钟有争议事件，哥连泰斯前锋喺龙门口被撞跌，但球证并冇示意犯规，引起客队球员激烈投诉，甘美奥随即反攻，哥连泰斯後衞般奴文迪斯飞铲将对手踢跌，球证本来向佢出黄牌，但经VAR介入後，决定升级为红牌。
        哥连泰斯职球员对判决非常愤怒，总监兼前球员阿历辛度纽尼斯怒火中烧，返入场馆直闯VAR控制室，数名保安喺VAR房门外将佢阻住，阿历辛度纽尼斯见到记者後，转为走去质问拍摄嘅记者。呢场比赛哥连泰斯虽然早早踢少个，但最终都赢1比0。
        阿历辛度纽尼斯事後表示：「呢个系我对抗荒谬VAR嘅方法，VAR根本冇帮助现场球证，我哋仲要忍受呢啲犯错几耐？呢几年球证委员会都换晒人，但错误仍然不断发生，我唔系搵藉口，我做咗唔合适嘅行为，但更重要嘅系VAR球证更加唔合适，我哋只系想要公平。」