卜比查尔顿丧礼 曼联仅4球员出席

xcy232323

       

        英格兰同曼联传奇卜比查尔顿上月底去世，周一(13日)喺曼彻斯特举行嘅丧礼，有近千人去到奥脱福球场外送别呢位一代球星，包括费格逊、坚尼、杰斯、史高斯等「红魔鬼」名宿。不过，曼联现役球员只得哈利马古尼等4人出席，连领队坦哈格都「甩底」，班主格拉沙家族都冇派代表出席，行为受到批评。
        卜比查尔顿贵为曼联史上最佳球员之一，丧礼竟然受到现役球员冷待，除咗奥拿拿、般奴费南迪斯等要向所属国家队报到嘅国脚无法出席外，华拉尼、利辛度马天尼斯、安东尼马菲奥斯、美臣蒙特、查顿辛祖等都自己选择唔出席，最後只得哈利马古尼、庄尼伊云斯、劳基梳尔同汤希顿4位现役球员到场。
        早前大赞卜比查尔顿系曼联「精神领袖」嘅坦哈格，就以喺荷兰有个「不可推却」嘅约会要出席，所以去唔到丧礼，而班主格拉沙家族亦冇派成员参加，被质疑对传奇缺乏尊重，《天空体育》主播Richard Keys直斥：「我唔理坦哈格有乜重要约会，佢唔出席丧礼就系一个耻辱，冇卜比查尔顿就唔会有曼联！」