朗尼带队5场1和4负 球迷担心伯明翰降班

xcy232323

       

        上月底接任伯明翰教鞭嘅朗尼，至今领军5场英冠联赛，结果令人惨忍睹，仅得1和4负劣绩，球队排名亦由原本第6直线下降至现时18位，球迷暂时冇怪朗尼，但就将矛头指向球队CEO曲克，闹佢无缘无故换帅，搞衰队波。
        上月离开美职华盛顿联队嘅朗尼，重返英伦教波原本系一件开心事，而且球队成绩唔错，朗尼接手前连胜哈特斯菲尔德同西布朗，联赛排第6，有机会争升班，但佢上任後，队波就连场落败，先後输畀米杜士堡、侯城同修咸顿，到前仗主场对叶士域治赛和2比2，总算止泻，但最新一轮对新特兰又输1比3，联赛跌至18位。
        《太阳报》报道，伯明翰无啦啦成绩急跌，引发球迷嘅降班忧虑，佢哋对朗尼暂时冇意见，但就认为CEO曲克严重犯错，闹佢无理解雇上任主帅乌斯泰斯，事关当初曲克表示，乌斯泰斯同球会理念不符，换帅系希望畀新领队明年1月转会窗重开时重建球队，冇谂过搞成咁。